НОВИ САД – Пияток, 27. марца отримана схадзка Скупштини Городу Нови Сад, хтору, попри значних одлукох означело и зраженє медзи директором Явного комуналного подприємства (ЯКП) „Информатика“ Мирослава Паровича (Треца Сербия) и Борка Илича (Демократска странка Сербиї), пре одпущованє роботнїкох з „Информатики“.
Уж тераз бувши роботнїки того подприємства пред схадзку протестовали опрез Скупштини Городу пре, як гварели – одкази нє по законє и як твердзели же их достали бо ше нє сцели учленїц до Трецей Сербиї, странки чийо кадри водза „Информатику“.
На остатнєй схадзки Скупштини Городу Нови Сад одборнїки принєсли одлуку же би ше перши тидзень у априлу означовало як Тидзень безпечносци младих у Новим Садзе, а прилапели и звит о роботи Координацийного цела за борбу процив насилства у школох на териториї Городу за период од юлия по децембер 2014. року. Прилапени и локални акцийни план за младих Городу за период 2015-2018. рок, та Одлука о вименкох и дополнєньох Одлуки о витворйованю потребох и интересох у обласцох младежского сектору на териториї Нового Саду.
Принєшена и Одлука о вименкох и дополнєньох Одлуки о месних заєднїцох, та програма потримовки у запровадзованю польопривредней политики и политики руралного розвою Городу Нови Сад за 2015. рок.
Одлучене же буду розписани явни конкурс за директорох новосадских ЯКП „Водовод и канализация“, „Урбанизем“, „Новосадска цепларня “, „Лисє“, „Городске желєнїдло“, „Драга“ и Явного городского транспортного подприємства.