КУЛА – Вирни грекокатолїцкей парохиї священомученїка Йосафата преславюю найрадоснєйше християнске швето Рождество Христово – Крачун, а з тей нагоди були аж два концерти колядох.
На Вилїю, Вельке повечериє (Всеночне) було на 23 годзин, а такой потим и перша Крачунска Литурґия Василия Велького хтору служели домашнї священїки парох о. Дамян Кича ЧСВВ и капелан о. Платон Салак ЧСВВ.
Рано, на Перши дзень, на 10 годзин парох о. Кича ЧСВВ служел Крачунску Службу Божу у церкви и як то традиция пречитал крачунску винчованку на руским и українским язику, нашого владики кир Георгия Джуджара. По Служби було и мированє.
Того дня на 10 годзин крачунску Литурґию о. Платон ЧСВВ служел у Крущичу, дзе филияла кулскей парохиї, и тиж читал владикову винчованку, а було и мированє вирних.
Того року у кулскей парохиї отримани аж два крачунски концерти, на Перши дзень Швета, после Служби Божей у церкви концерт колядох и винчованкох традицийно отримал домашнї КУД „Иван Сенюк”, а на Други дзень вербаске КУД „Карпати”.
Нєшка на Треци дзень швета, кед ше слави и першого мученїка св. Штефана, Литурґия у кулскей церкви будзе на 9 годзин.