У Пелетовей сали у Коцуре пришагали велї млади, велї праве там преславели народзенє дзецка, родзени дзень, одход до войска и други найважнєйши хвильки у живоце. Споза орґанизациї тих вешельох – Михайло Варґа Пеле и його супруга Мелания. Док другим викенд звичайно час за одпочивок, Пеле и Менда праве всоботу и внєдзелю найзавжатши.
Пелетова сала наполнєла 16 роки, и ище вше ше нука у нєй викруцаю млодята, свадзебни, даяки млади бачи, андя… А до погосцительней роботи Менда и Пеле нє вошли пред 16 роками, кед сала отворена, алє вельо скорей. Дзешец роки пред тим вони тримали пицерию „Ал Капоне”.
– Теди нє було даякей алтернативи за роботу, и мой оцец бул инициятор же бизме почали приватно дацо робиц. То ше указало як добра солуция, бо зме, поведзме, зарабяли три раз вецей як кед бизме робели даґдзе индзей у даякей фирми. Нам тоти роки, док зме робели, були плодни, гоч живот, тих 90-тих, бул барз чежки. Уложели зме пенєж, дакус зме и пожичели, алє то нє бул проблем, бо зме пошвидко могли шицко врациц – памета Пеле.
Роздумуюци о будучносци, у медзичаше Варґово видзели єдну иншаку нагоду, и нє бали ше ю випробовац. Нєдалєко од пицериї бул Младежски дом, у хторим ше теди отримовало свадзби. Дом уж теди бул у подлим стану, руйновани, а другей просториї у хторей би могло змесциц велїх людзох у валалє нє було. Проґнозуюци же Младежски дом знайдзе судьба яка го познєйше и знашла, Варґово уложели вельки пенєж и вибудовали салу за свадзби.
ШМЕЛОСЦ ШЕ ВИПЛАЦЕЛА
Кед ше Менда и Пеле побрали, и вони свадзебне вешелє отримали у Младежским доме. Пеле толкує же ше теди кажде хто рихтал свадзбу у Младежским стретал зоз проблемами як цо то оправянє пецох, струї, и подобне. Прето Варґово 1998. року почали будовац нову салу за свадзби.
– Праве прето же зме уж дакус вошли до тей бранши, надумали зме предлужиц зоз погосцительну роботу. Швидко зме подзвигли салу и закрили ю. Бомбардованє нас дакус загамовало, алє уж 2000. року, 13. мая, у сали було перше вешелє. Праве щесце же того, 2000. року, було аж 26 свадзби. Чежко було дойсц до соботи хтора була шлєбодна. Людзе то добре прилапели, а и ми були досц вигодни и зоз цену. Єден час зме видавали лєм салу, а домашнї орґанизовали шицко друге, таки бул обичай пред тим, но пошвидко ми шицко сами орґанизовали – бешедує Пеле.
Зочуюци ше з новим способом роботи, Пеле и Менда дзечнє прилапйовали совити и помоц. Гваря же то нє було так лєгко як им випатрало скорей як почали робиц, алє накадзи ше лапели до тей роботи, пошвидко станули на ноги.
– Нє мали зме тельо средства, бо зме ше нє сцели барз задлужиц, та спочатку нє було шицко готове. Алє, поведзме, бачи Микола Скубан напредок закапаровал свадзбу, же би нам помогол купиц танєри, видлїчки, ложки и ножи. Кед слово о полудзенку, барз ми помогла андя Маря Кучмашова. Вона робела як кухарка на свадзбох у Младежским доме. Порадзела нас же як то треба порихтац єдзенє за векше число людзох. Спочатку вона варела, а вец помали я од нєй преберала ремесло. Вона була перша кухарка и до нєдавна робела у нас – гвари Менда и спомина же найвецей рихтали за 450 людзох, кед було госцох и на тераси, алє и под стреху, и нука у сали.
Же би себе олєгчали, кус познєйше Варґово почали и бивац коло сали, нє роздумуюци як то будзе. Прилапели то як способ живота. Толкую же им викенди завжати, та кед даєдна собота без свадзби, тот дзень им окреме нєзвичайни, як рочни одпочивок.
СВАДЗБИ МЕНШИ, ТРОШОК ВЕКШИ
З роками, Менда и Пеле обачовали як ше свадзби у валалє пременєли, нє тирвали од рана до рана, пременєл ше и кост, музика и обичаї. Нєшка свадзби кратши и менши, домашнї маю менєй роботи, алє за таке муша вецей заплациц як дакеди.
– Перши 5-10 роки свадзби були од рана до рана. Пред поладньом було винчанє, та скорей поладня людзе уж були у сали на вешелю. То було барз чежко и за нас и за домашнїх. Спочатку нє було „бичаки” после свадзби, алє вец вше частейше, и тераз то уж цалком звичайне. Свадзби ше орґанизовало од пополадня, а тот полудзенок од соботи ше преруцел на нєдзелю. На нашо обичаї и нєшка велї нє забули, алє су помишани и скрацени. Поведзме, припитованє млоди хторе дакеди було у млодийовим обисцу после винчаня, нєшка ше окончує праве ту, у сали. Нєшка уж слабо млода збера за папучи, а на квиценє шицки даваю – гвари Менда.
Од Пелета дознаваме же спочатку вельки проблем були видлаше, алє и тот обичай уж пошол до историї.
– У Младежским доме то бул окреме вельки проблем, и тото ше пробовало пренєсц и до нас. После пол ноци часто було нєповоланих на свадзби, алє на тедишню инициятиву Рафаила Русковского, полиция барз часто патроловала на свадзбох, и таке ше викоренєло. Теди людзе поцерпали же яки буду мац проблеми зоз видлашами, а нєшка ше ми видзи же кед би дахто пришол видлашиц на свадзбу, шицки би на ньго боком патрели – гвари Пеле.
ЧИ ШЕ ВИПЛАЦИ ПОНУКНУЦ ЛУКСУЗ
Складаю ше и Варґово, а и кажде би ше зложел же свадзби нєшка нє таки як дакеди. Кед ше патри яки общи упечаток, обачує ше же свадзба вецей нє бодай би ше лєм пило и єдло. Млади тераз вецей уваги даваю випатрунку сали, шветлом, декорациї, окремним менийом за костиранє… Варґово ище вше нє сиґурни чи би уложиц до сали и претвориц ю праве до того ґу чому ше намагаю луксузни сали у варошу, чи нє укладац и прицагнуц тих цо им праве туня сала одвитує.
– Було о тим надосц бешеди медзи нами. То, заш лєм, валал, а мали зме и свадзби з боку, праве прето бо им одвитовала нїзка цена по карсцелю. Нє було би проблем уложиц, я окреме мам таку амбицию, алє вец би цена була вельо векша, а питанє чи би ше то виплацело – роздумує Михайло, хтори ище вше зоз супругу нє одлучели цо почню и як предлужа робиц тото цо давно започали.
ПЕЛЕТОВ САЛАШ
Нєдавно Варґово пожадали купиц викендицу у природи. Познєйше одлучели же то будзе за беґельом у валалє, и же ґу викендици добудую єдну просторию за менши вешеля. То ше указало як добри крочай.
– Жадал сом купиц викенд хижку на Тиси, алє ознова випадло же лєпше ту, у валалє. Добудовали зме ґу викендици коло сто квадрати за меншу салу, за даяки родзени днї, одходи до пензиї, матури и менши вешеля. Каждому ше пачи буц у природи, а нїкому нє завадза галайк и музика. То и менша простория, та треба и менєй зогривац – гвари наш собешеднїк, бешедуюци о уж познатим його, а Пелетовим салашу.