РУСКИ КЕРЕСТУР – Всоботу, 9. мая, на дзень пренєшеня мощох св. Оца Миколая, парохиянє Руского Керестура шветочно преславели храмове швето нашей Катедралней церкви – Кирбай.
Архиєрейску Службу Божу предводзел преосвящени владика кир Георгий Джуджар, вєдно зоз 14 священїками, найвецей з парохийох нашого Еґзархату, двоме були з Крижевского владичества, єден з Македониї и домашнї парох о. Михайло Малацко и капелан о. Владимир Медєши.
Владика у казанї шицким повинчовал Кирбай и здогаднул на заступнїцтво св.Миколая, та пожадал же би його живот, хтори бул наполнєти з любову ґу Богу и вельким милосердийом ґу ближньому – бул приклад шицким вирним.
Служба Божа закончена з Кирбайским одпустом и читаньом євангелиї на шицких штирох бокох швета, а владика потим пошвецел и будинок церкви з вонка, як и красне число вирних, домашнїх и їх госцох.
Вельо вецей нащивительох було на вашарскей часци Кирбаю, дзе през скоро цалу Русинску улїцу, од центру валалу ґу Косанчичу, були числени предаваче и забавни бависка.
