НОВИ САД – У Културним центру Нового Саду вчера вечар новосадски Хор „Гармония”, зоз своїма госцами, отримал концерт з нагоди 70-рочнїци постояня Руского културного центру (РКЦ). Присутних привитала директорка РКЦ Наташа Макаї Мудрох, а о Хору бешедовал його директор Борислав Сакач, котри з тей нагоди наявел и означованє 10-рочнїци „Гармониї”, идуцого року.
Под диригентством Сузани Ґрос Маркович, з клавирским провадзеньом Йозефа Ритера, Хор одшпивал даскельо духовни, шветово познати и руски народни композициї зоз свойого репертоару хтори пририхтовал зоз спомнуту дириґентку, а композициї шпивани на вецей язикох. Члени Хору Ана Римар и Гелена Папуґа наступели и як солистки.
На вчерайшим концерту, як госци Хору участвовали Женска вокална ґрупа „Романтика” з Нового Саду и наш познати ґитариста Димитрий Цап и Милан Миланов на бас приму.
Медзи другима госцами, на концерту присуствовали и народна посланїца Олена Папуґа, заменїк предсидателя Националного совиту Руснацох Йовґен Мудри, новосадски парох о. Юлиян Рац и о. Роман Миз, котри бул и идейни творец за снованє Хору „Гармония”.