„Костельникова єшень” почала з представяньом кнїжкох за дзеци

автор зам
858 Опатрене

РУСКИ КЕРЕСТУР – Тогорочна Културна манифестация „Костельникова єшень” почала вчера дополадня з промоцию найновших кнїжкох за дзеци у виданю НВУ „Руске слово”, так же школяром нїзших класох ОШ „Петро Кузмяк”, у присустве авторкох, представени кнїжки „Котульки и ґомбульки” Ирини Гарди Ковачевич, „Гайзибан на шпарґу” Меланиї Римар и „Злагода” Серафини Макаї, а на представяню присуствовала и илустраторка Мария Ковачевич.

Госцох и школярох привитала директорка Школи Хелена Пашо Павлович, а у мено „Костельниковей єшенї” и видавателя Микола Шанта, котри накратко представел кажду зоз спомнутих кнїжкох.

Прейґ контакту и розгварки з дзецми, кажда писателька пречитала и писнї, загадки и приповедки зоз своїх кнїжкох, а у програми участвовали и школяре – Ема Живкович и Дямян Чапко пречитали писню Гавриїла Костельника „Чежка робота”, Тияна Бучко и Даниєл Надь приповедку Меланиї Римаровей „Ядловчик хлапчик”, а Иван Планчак писню „Злагода” Серафини Макайовей.

Исти кнїжки познєйше представени и школяром висших класох керестурскей ОШ, а у музичней часци програми, з провадзеньом Сашу Палєнкаша на ґитари, Танита Ходак одшпивала свойо, та забавни композициї Златка Русковския и Славка Романа Ронду.

З нагоди „Костельниковей єшенї” у голу Школи була виложена и вистава з назву „Нашо памятки”, пошвецена историї Руснацох, як и дзепоєдни подобово роботи з тему манифестациї.

ПОВЯЗАНИ ТЕКСТИ