Крачунска и новорочна винчованка владики Георгия

автор рсл
1.5k Опатрене

АПОСТОЛСКИ ЕҐЗАРХАТ – З нагоди Крачуна и Нового року, апостолски еґзарх за грекокатолїкох у Сербиї, владика Георгий Джуджар шицким вирним упутел шлїдуюцу винчованку:

– Шицко коло нас и у нас бешедує о любови Божей. През цалу историю Бог чловекови давал потвердзеня тей своєй любови. З любови Бог створел чловека, з любови му пребачел нєпослух и такой теди обецал приход Спасителя. Найвекши знак любови ґу чловекови то посиланє Сина свойого медзи нас, котри ше отїлотворел и родзел ше од Пречистей Дїви Мариї. Тот дарунок наменєни цалому чловечеству, бо Син Божи, котри постал чловек, оможлївел спашенє шицким котри го чекали и глєдали през велї вики, як и шицким нам, котри го и нєшка глєдаме и прилапюєме зоз щирим шерцом. У своїм Синови Бог даровал нам нє дацо од себе, алє самого себе! Бог так люби людзох же и сам постал чловек.

– Прето Рождество Христово нє лєм памятка и здогадованє на тот вифлеємски дарунок, алє и радосц и подзекованє Господу Богу же нас нїґда нє престава любиц. То тота сиґурносц у вири и надїї, у турбулентних дньох каждого чловека котри ше правдиво опредзелює за Исуса Христа. То тот правдиви мир у чловекови и теди кед є нє прилапени, нє зрозумени и понїжени, часто и од своїх найблїзших.

– Мир котри приноши Исус уключує у себе тирваце закладанє за добро и борбу процив зла. Драга котра водзи до Його миру нєлєгка, а церньова. Же би нам дал мир и помирел нас з Богом и медзисобно, Исус и сам поднєсол церпеня, дожил одруценє и знєважованє. Так и нашо особне опредзелєнє за Исуса нїґда нєлєгке и без почежкосцох, а часто боляце и чежке, бо уключує дошлїдносц, витирвалосц и вирносц. Алє, нє бойме ше! Исусов жемски живот дава нам приклад шветлей конєчносци у радосци, у щесцу и Божей любови. Дава нам єдносц и фамелийну цеплоту, дава нам блїзкосц и сиґурносц Оцового дому и карми зоз силу Божескей моци.

– Цо Новородзени нам принєше у тих дньох крачунских шветох, завиши праве од нашого пририхтованя и опредзелєня. Чи то будзе мир, пребаченє и помиренє, або нови подзелєня, нємир и нєскладаня – то нє завиши од Нього… Вон нам понука мир, бо є и Сам Мир. Вон и през тоти крачунски швета задурка на дзвери нашого шерца, а келї з нас буду порихтани отвориц их, завиши од каждого поєдинєчно.

– Шицки зме поволани буц ношителє мира, през котрих ше Исусов мир населї до каждого з нас. Та вец и тоти днї Рождества буду дихац з радосцу, щирима винчованками и жаданями за мир у наших шерцох, у наших обисцох и у наших парохийох. През тоти крачунски днї будземе з любову даровац єдни других, алє налєпши дарунок будзе дарунок Новонародзеному, кед будземе даровац себе, так як ше Вон даровал нам.

– Винчуєм каждому весели и радосни Швета Рождества Христового и благословени Нови рок! Най нашо шерца буду наполнєти з Божу любову и миром, ношме тот дар нашим ближнїм, там дзе го найбаржей потребую! Христос Раждаєтся!

Ваш владика
+ Георгий Джуджар

ПОВЯЗАНИ ТЕКСТИ