ДЮРДЬОВ – На соботу, 28. новембра, у Дюрдьове будзе Шветочни концерт з нагоди 70-рочнїци снованя КУД у тим месце, а як прешлого пиятку поведзене на схадзки Управного одбору КУД „Тарас Шевченко”, орґанизация програми за преславу при концу.
Як гварел предсидатель Дружтва Микола Кухар, на Шветочним концерту з нагоди ювилею наступя вецей танєчни, шпивацки и музични ґрупи секцийох КУД, солисти, рецитаторе и ґлумци, як терашнї, так и дакедишнї члени секцийох.
– Слово о вецей ґенерацийох, котри активно участвовали у секцийох нашого Дружтва пред трицец пейц, штерацец, та и вецей роки. Задовольни сом же ше красне число дакедишнїх аматерох одозвало участвовац у програми, та и гевти котри на проби путую з других местох – гварел Кухар.
През масовносц и квалитет програми будзе представена вецейдеценийна робота аматерох дюрдьовскохо КУД „Тарас Шевченко”, котри наградзовани з найвисшима припознанями у рижних културно-уметнїцких обласцох.
Шветочни концерт на соботу будзе Велькей сали Задружного дому.