РУСКИ КЕРЕСТУР – У опущеней атмосфери коло озерка при беґелю у Руским Керестуре вчера отримана програма „Оживйованє Литератури по руски“, на хторей свойо твори представели нашо уж афирмовани и менєй афирмовани писателє и поетове, котри свойо твори обявюю на Фейсбук боку „Литература по руски“.
Любителє писаного слова вчера чули тексти Тат`яни Латяк Беук, Асї Папуґа, Тамари Хрин, Олени Живкович, Ирини Жеґарац, Сашу Сабадоша, Жарка Остоїча, як и тексти подписани зоз псевдонимом. Задумка орґанизаторох витворена, понеже ше на єдним месце зишли людзе рижних ґенерацийох, фахох, способох писаня и искуствох, а котрих вяже любов ґу литератури.
Модераторки вчерайшого друженя були Александра Живкович и Александра Лендєр, котри поезию и прозу попреплєтали з дискусиями на рижни теми, медзи иншим и о феномену Фейсбуку, значеню „лайкох“, учасци интернету у промовованю литературней творчосци, а у тим зоз своїма коментарами участвовала и публика.
Живковичова и Лендєрова визначели же треба най пише кажде хто ма инспирацию, а з тим вечаром „слички зоз Фейсбуку“ поволани най виду пред людзох и свойо думки и чувства подзеля з другима. Ґу тому, то нагода чуц роздумованя и филозофию других, цо вчера и витворене.
Програму „Оживйованє Литератури по руски“ орґанизовал ушорйовацки тим додатку „Руского слова“ – „Литературне слово“, у сотруднїцтве зоз Здруженьом младих „Пакт Рутенорум“.