РУСКИ КЕРЕСТУР – Лиґа социялдемократох Войводини (ЛСВ) на ютре, 24. октобра, на пияцу у Руским Керестуре орґанизовано будзе зберац подписи гражданох процив оможлївйованя предаваня жеми странцом, у акциї тей странки на збераню 100 000 подписох у Войводини процив спомнутей намири.
Зберанє подписох на керестурским пияцу на ютре будзе од 9 до 12 годзин.
Як ше гвари у пропаґандним материялу Лиґи хтори провадзи акцию збераня подписох – „Од 1. септембра 2017. року странци годни куповац войводянску жем без було яких огранїченьох. Место же би охранєло домашнїх польопривреднїкох, як цо то зробели влади у шицких жемох членїцох ЕУ, Министерство польопривреди Републики Сербиї ище и оможлїви странцом и тайкуном же би без завадзаня брали державну жем, а наш польопривреднїк нї на яки способ нє защицени”.
ЛСВ спозорює „же ше жем нє предава” и поволує гражданох же би ше им придружели „у одбрани нашей жеми, бо кед ше ми нє побунїме, други ше нє побуня” – гвари ше у поволанки Лиґи и Керестурцом за зберанє подписох.