Менєй виновни дїла як влонї

автор зам
1k Опатрене

ЗАХОДНОБАЧКИ ОКРУГ – На подручу Полицийней управи Зомбор, под чию компетенцию општини у Заходнобачким округу (Зомбор, Кула, Апатин и Оджак) за перши тогорочни осем мешаци, у одношеню на прешли рок, за 8 одсто зменшани виновни дїла – сообщене концом септембра на конференциї за медиї.

У обласци общого криминалу було 1 120 виновни дїла, цо зменшанє за 9,6 одсто, а крадзи и далєй найчисленши виновни дїла. Крадзи зоз 308 случайох зменшани на 293, а чежки крадзи зоз 334 на 290 и векшином су розяшнєни. Розяшнєни и три зоз штирох розбойнїцких крадзох.

Як сообщує ПУ Зомбор, число насилствох у фамелиї на истим уровню як и прешлого року. Лєгки виновни дїла було 22 одсто и 14 одсто з чежкима тїлеснима повердзованями.

У перших тогорочних 8 мешацох приявени менєй окончователє виновних дїлох як влонї – 749, а 2015. року их було 794. Менєй було и виновни дїла малолїтних – з цалосного числа 2015. року виновни дїла малолїтнїкох було 10,7 одсто, а того року 7,87 одсто.

У обласци привредного криминалу було 91 виновне дїло, цо за 7 вецей як прешлого року, а медзи нїма 31,8 одсто були з елементами корупциї.

У обласци явного порядку за 3,37 одсто було менєй потупеня як прешлого року, алє вецей малолїтних окончовательох – 53,49 одсто, як и ґрупни потупеня.

Число транспортних нєщесцох – 371, подобне як и прешлого року – 379, а 16,6 одсто у нїх були смертельни случаї.

ПУ Зомбор у анализованим чаше видала 25 000 електронски особни леґитимациї, а и з тей нагоди надпомина же стари важа до 31. децембра того року. З ПУ тиж надпоминаю же по 1. новембер, без доказованя походзеня, шицки можу придац шицки файти оружия и леґализовац их.

ПОВЯЗАНИ ТЕКСТИ