РУСКИ КЕРЕСТУР – Месна орґанизация инвалидох Руского Керестура ше нєдавно уселєла до новей заєднїцкей просториї у Месней заєднїци, дзе будзе робиц кажду соботу од 10 до 12, а внєдзелю од 10 до 11,30 годзин – дознава Рутенпрес од предсидателя Орґанизациї Владимира Сеґедия.
Месна орґанизация инвалидох роби уж рок и ма коло 20 членох, хторим помага витвориц рижни права зоз социялней и здравственей защити, туньше обезпечиц рижни продукти и подобне.
Як визначел Сеґеди, члени ше можу активовац и у спорту и рекреациї, понеже на уровню Општинскей орґанизациї инвалидох барз успишнє роби єй спортскей дружтво и посцигує одлични резултати, од покраїнского по державни уровень, у рижних спортох – шаху, одбойки на шедзацо, ґуґланю, штреляцтве, риболове и другим.