КУЛА – После потвердзованя мандатох новим 37 одборнїком у Скупштини општини (СО) Кула и констатованя преставаня мандатох и функцийох у СО, єй роботних целох и у вивершних орґанох Општини, та даваня и подписованя одборнїцкей пришаги, на вчерайшей конститутивней схадзки за предсидателя СО Кула з тайним гласаньом вибрани Велибор Милоїчич зоз Сивцу, зоз Сербскей напредней странки (СНС), а за заменїка предсидателя Татяна Квасни з Кули, тиж зоз СНС. За секретара СО поставени дотерашнї секретар Милорад Вуксан з Кули. По вибор предсидателя, на конститутивней схадзки СО предшедовала найстарша одборнїца Мария Шепински (СНС) з Руского Керестура.
Предсидатель СО Кула Велибор Милоїчич (1963) у прешлим мандату окончовал функцию заменїка предсидателя Општини Кула, а заменїца предсидателя СО Татяна Квасни (1968) роби як медицински лаборант у Доме здравя.
З тайним гласаньом, за предсидателя Општини Кула на вчерайшей схадзки СО вибрани привреднїк з Кули Перица Видеканїч (1972), предсидатель Општинского одбору СНС, а у прешлим зволаню локалного парламенту бул шеф одборнїцкей ґрупи своєй стрнаки.
На предкладанє Видеканїча, за заменїка предсидателя Општини Кула, тиж з тайним гласаньом, вчера вибрани привреднїк з Кули Кароль Валка (1954), зоз Союзу войводянских Мадярох (СВМ), котри у скорейших зволаньох уж окончовал одвичательни функциї у СО и у Општини.
Понеже предсидатель Општини источашнє и на чолє Општинскей ради (ОР), на його предкладанє до Ради вибрани дзевец члени, а медзи нїма и тапетар Александар Кочиш з Руского Керестура.
Пред вибором чолних функционерох Општини вибрани и два роботни цела СО – Комисия за мандатно-имунитетни питаня и Комисия за кадрово питаня, до хторей вибрани и Владимир Варґа з Руского Керестура (СНС).
Спрам вчерайшого гласаня на першей схадзки локалного парламенту, векшину, односно власц у кулскей општини творя СНС з 19 одборнїками, СВМ з двома и Сербска радикална странка, тиж з двома одборнїками, односно їх лїстини хтори участвовали на виберанкох 24. априла, та на повторених виберанкох на двох местох 30. априла и 5. мая.
У опозициї одборнїки з лїстини коалициї коло Демократскей странки (ДС), Социялистичней партиї Сербиї (СПС) и єдинственей Сербиї (ЄС), хтори маю по штири одборнїцки места, як и двоме одборнїки з Русийскей странки-Герцен Радонїч Кека.
На вчерайшей схадзки формовани и одборнїцки ґрупи у СО Кула, а нови предсидатель Општини Перица Видеканїч уж наявел же на шлїдуюцей схадзки СО будзе ребаланс, як гварел, виразно инвестицийного буджету, та же пошвидко почнє витворйованє и єдного з найвекшого задатку хтори себе и вон и нова власц поставели – обезпечованє нових роботних местох за нєзанятих у општини.
З Руского Керестура у новим зволаню СО Кула одборнїки Мария Шепински и Владимир Варґа зоз СНС и Борис Шайтош з ДС.