НОВИ САД – Предсидатель Покраїнскей влади Иґор Мирович виявел же з буджету АП Войводини за польопривреду у 2017. року буду опредзелєни осем милиярди динари.
Тот податок Мирович винєсол пияток, 16. децембра, на уручованю контрактох з локалнима самоуправами у Войводини о софинансованю проєктох вибудови и реконструкциї водових обєктох, а гварел и же нарок до польопривреди буду уложени вецей средства як 2016. року.
По його словох, средства буду звекшани за скоро шицки сеґменти польопривредней продукциї, а звекшанє будзе и у обласци лєсарства.
О буджету АП Войводини Скупштина Войводини будзе розправяц на ютре, 20. децембра.