РУСКИ КЕРЕСТУР – З нагоди апелох на молитву и пост за преставанє воєних зраженьох у України, шестри Служебнїци непорочней Дїви Мариї нєшка, 2. марца, як знак солидарносци зоз Вселенску Церкву и українским народом, поволую шицких вирних на молитву до нашого святилїща – Водици.
Процесия до Водици руша на 14,30 годзин з Катедралней церкви святого Миколая у Руским Керестуре. През драгу ше буду модлїц пацерки, а на 16 годзин у Водици будзе Молебен до Пресвятей Богородици.
Наш владика Георгий прешлей нєдзелї видал апел же би ше и нашо парохиї приключели до взагальней молитви и посту цалей Вселенскей Церкви, на котру нєшка, 2. марца, за преставанє воєних зраженьох у України, поволал папа Франциск.