РУСКИ КЕРЕСТУР – Зоз свою монодраму „Срим наша хижа” вчера на Мемориялє частвовал єден з ридких професийних ґлумцох медзи Руснацами – Владимир Балащак зоз Сримскей Митровици. Монодрама, у режиї Драґана Йовичича Йовича, витворена у продукциї театрох „Ирена Колесар” и „Добрица Милутинович” зоз Сримскей Митровици, а треба надпомнуц же є и побиднїцка на прешлорочним Руским фестивалє малих сценских формох „Дюра Папгаргаї”.
Балащак ґлумел по руски и по сербски, а през комични, алє местами и озбильни сцени, представел сримски менталитет, док на саркастични способ викритиковал и стан у нашей держави, та и медзи Руснацами.
И з тоту монодраму Балащак повердзел же є професионалєц, а чкода же представу вчера вечар нє провадзело векше число публики, бо вредзело видзиц його трасформациї до вецей особох, розкошни талант и за шпиванку, як и послухац добри самого ґлумца.
Вецей фотоґрафиї з представи у окремней ґалериї на початним боку сайту и на правим боку Рутенпресу.