НОВИ САД – Члени Церковного одбора и вирни у Новим Садзе, на чолє зоз парохом о. Юлияном Рацом, вредно порая парохийни дом, а плановане же ше парох до ньго уселї 30. мая.
На акциї 16. мая будовало ше нову терасу, односно уход до парохового дому, а уж закончени дзвери до библиотеки и канцелариї.
– Нука, у церковней сали, треба виняц патос и положиц цегелки, цо у кухнї уж поробене – гварел предсидатель Церковного одбору Мирослав Грубеня. – Шицки облаки ше шмирґла, ґитує и фарби. Задовольни сом з одволаньом на тоту акцию, пришли велї, алє за каждого єст роботи.
По Грубеньових словох, акцию ше предлужи з ушореньом церковней сали и квартеля за дзияка. Под будинком єст и велька пиньвица, ма коло 100 квадратни метери, хтору ше хаснує за чуванє огриви, а єст вимоги же би ше ю обновело и хасновало и за други потреби.