НОВИ САД – Подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш вчера у Покраїнскей влади бешедовал з предсидателями 14 националних совитох националних меншинох хторим шедзиско у Войводини, медзи котрима бул и предсидатель Националного совиту Руснацох Славко Рац.
З тей нагоди подписани контракти о додзельованю пенєжу националним совитом за їх порядну дїялносц, а Нїлаш здогаднул же Секретарият хторому є на чолє того року видвоєл вєдно 55 милиони динари за порядну и розвойну дїялносц националних совитох. З ребалансом покраїнского буджету обезпечени ище 20 милиони динари за финансованє тих институцийох.
Присутни предсидателє совитох на вчерайшим стретнуцу накратко винєсли дотерашню и плани за будуцу роботу совитох у нових зволаньох, а констатоване же сотруднїцтво з Покраїнским секретариятом за образованє, предписаня, управу и национални меншини-заєднїци барз важне за їх роботу. Бешедоване о злєпшованю того сотруднїцтва, алє и о умрежованю шицких националних совитох.