НОВИ САД – На першей порядней схадзки Вивершного одбору Националного совиту (ВО НС) Руснацох, отриманей вчера у просторийох Заводу за културу войводянских Руснацох у Новим Садзе, главна точка була формулованє предкладаня обсяжного дньового шору за штварту схадзку НС Руснацох, хтора будзе 28. марца у Руским Керестуре.
Як предвидзене, члени НС ше будзе вияшньовац о Финансийним звиту и закончуюцим рахунку за 2014. рок, Звиту о роботи у 2014. и Планє роботи Националного совиту у 2015. року. На дньовим шоре буду и одвитуюци рочни документи установох чий Совит снователь, лєбо соснователь – НВУ „Руске слово”, РНТ „Петро Ризнич Дядя” и Заводу за културу войводянских Руснацох.
По предкладаню дньового шору, НС будзе одлучовац о вименки и дополнєню свойого Статута, так же би место планованого Роботного цела за управу и предписаня, тото цело було оформене як Пододбор за управу и предписаня у рамикох постояцого Одбору за службене хаснованє язика и писма. Предвидзене менованє членох спомнутого пододбору, як и члена Одбору за службене хаснованє язика и писма з подруча Општини Жабель. Членство Роботного цела за младеж мало би буц преширене за нового, 14. члена, з Нового Орахова.
На дньовим шоре будзе и менованє координацийох подручних канцеларийох НС, як и одлука о пременки шедзиска Подручней канцелариї у Сримскей Митровици. Тема схадзки будзе и предкладанє местох дзе у даскельо наступних рокох буду Централни преслави Националного швета Руснацох, як и даскельо одлуки ВО НС.
На дньови шор штвартей схадзки НС Руснацох Вивершни одбор предклада и одлуку о додзельованю позарядових поєдинєчних стипендийох двом школярком рускей Ґимназиї у Руским Керестуре, котри зоз свою роботу буду участвовац на Европскей математичней конференциї штредньошколцох ЕВРОМАТ у Атини, у Греческей.
З нагоди вимогох за финансийну потримовку з наших КУД и здруженьох вязаних за означованє ювилейох, на вчерайшей схадзки одлучене же би ше их ришовало з локалнима самоуправами, за цо НС и шицки його орґани место финансийней, обезпеча полну институцийну потримовку.
Попри шицких пецерих членох ВО, на вчерайшей схадзки у Новим Садзе присуствовали и предсидатель НС Руснацох Славко Рац, директорка НВУ „Руске слово” Мартица Тамаш, директорка РНТ „Петро Ризнич Дядя” Ивана Дудаш и директор Заводу за културу войводянских Руснацох Серґей Тамаш.