ДЮРДЬОВ – Основна школа „Йован Йованович Змай” вовторок, 24. новембра, шветочно преславела свой дзень, односно дзень народзеня єдного з найзначнєших сербских поетох и просветительох, чийо мено ноши.
Пред преполну спортску салу з публику у програми участвовали школяре з музичнима и танєчнима точками, рецитациями по английски, сербски и руски, з драмску сличку, а пречитани и состав з тему „Инклузия жиє у нашей школи”.
Директорка Школи Мария Тртич з тей нагоди наглашела значносц отримованя годзинох на сербским, руским и ромским язику, як виборним. Як гварела, прето Школа достала „уходну карту за швет инклузиї” и була уключена до велького дворочного проєкту Европскей униї и Совиту Европи „Реґионална потримовка инклузивному образованю”, у хторим участвовали седем школи у Сербиї, а закончени є того мешаца.
Публика прейґ видео-биму видзела и презентацию Школи у рамикох спомнутого проєкту, а представени ище дзешец проєкти хтори у дюрдьовскей ОШ витворени од 2002. року.
Шветочносц пририхтали учителє и наставнїки зоз своїма школярами и школярски орґанизациї Школи, а на програми присуствовали и делеґациї школох з Руского Керестура, Коцура, Ґосподїнцох и ОШ „Жарко Зренянин” з Нового Саду, представителє Месней заєднїци Дюрдьов, як и представителє месних здруженьох и орґанизацийох.
