РУСКИ КЕРЕСТУР – Члени Еколоґийного руху (ЕР) „Желєни персцень” з Руского Керестура, вєдно з коло 10 школярами-активистами стреду, 30. новембра, на Новим населєню у Керестуре посадзели 50 древка – шпански вишнї и пауловниї.
Як гварела предсидателька Руху Леона Доротич Ґутеша, окреме ше цеши же за тоту акцию були заинтересовани млади и наздава ше же постаню порядни учашнїки у таких акцийох.
Древка пауловниї, 30 младнїки, подаровал Синиша Мали з Коцура, цо уж други раз же Мали на таки способ потримує активносци „Желєного персценю”. Древка шпанских вишньох обезпечела Доротичова.
ЕР тераз планує новопосадзени древка защициц з латками, а идуце садзенє древкох будзе орґанизоване на яр, тиж коло Нового населєня, наявела Доротичова.