ДЮРДЬОВ – Парохиянє дюрдьовскей парохиї Рождества Пресвятей Богородици з Воскресну утриню и дополадньову Службу Божу, на хторей пошвецани и кошарки з пасхалним єдзеньом, означели Перши дзень Велькей ноци.
Службу служели дюрдьовски парох о. Йоаким Холошняй и о. Борис Холошняй зоз Швайцарскей, шпивали Церковни хор Розанов, под руководительством Татяни Барна, а у хторим шпивал и ґосподїнски парох о. Михаил Холошняй. Винчуюци тото найзначнєйше християнске швето, о. Йоаким Холошняй у казанї гварел:
– Христос воскресе! Так здравкаме у окремним периодзе рока, и кед вигваряме тоти слова вец до нашей души, до нашого розуму, до нашей волї приходза нєобични роздумованя и чувства вязани за рижни ствари нєшкайшого швета. Шицко тото нам приємне и миле, алє о тих словох треба частейше и глїбше роздумовац. Христос станул з мервих – барз нєобичне, нєвироятне, вельке, алє по нашим християнским увереню, цалком стварне – гварел о. Холошняй.
На концу Служби у порти пошвецени кошарки з пасхалним єдлом, котрих того року було у кресним чишлє. Попри Дюрдьовчанох и їх госцох, на пошвецаню були и дакедишнї жителє Дюрдьова, котри ше з валалу одселєли до иножемства, лєбо до других местох.
Нєшка, на Шветли пондзелок, на 7 г. будзе Воскресна утриня, на 9 Служба Божа, а на 18 годзин Вечарша Служба Божа и Воскресна вечурня.
