КУЛА – Републични фестивал аматерских театрох, хтори ше роки отримує у Кули, почина на пияток, 19., а тирва по соботу, 27. юний.
На 57. Фестивалє у конкуренциї за награди участвую 8 представи, медзи нїма аж два драмских аматерох з кулскей општини – з кулского Културного центру и з КУД „Крущич” з Крущичу, та представи з Прокупля, Ґорнього Милановцу, Беоґраду, Смедеревскей Паланки, Старей Пазови и копродукцийна представа аматерох з Боґатичу и Прнявору. Остатнї дзень, госцуюцу представу одбавя студенти Драмского одсеку Факултету уметносцох з Приштини.
Фестивал на пияток почнє з отвераньом вистави малюнкох Павла Блесича у Подобовей ґалериї Културного центру (КЦ), та з традицийним палєньом Фестивалского огню опрез КЦ.
Пририхтана и досц богата провадзаца програма, а єдно зоз збуваньох будзе з назву „Панонски канцониєр”, на хторим наступя найлєпши рецитаторе з местох кулскей општини, котри того року участвовали, у двох катеґорийох аж и победзели на Републичней смотри рецитаторох у Валєве.
Орґанизатор и домашнї Фестивалу Союз аматерох Сербиї, Културно-просвитна заєднїца Општини Кула, Општина Кула и кулски КЦ.
Представи у сали КЦ Кула починаю на 20 годзин.