СРИМСКА МИТРОВИЦА – Под час програми Дружтва Руснацох у Сримскей Митровици з назву „Мацери Рускинї”, хтора штварток, 18. децембра отримана у Театре „Добрица Милутонович”, у його голу була вистава старих фотоґрафийох митровицких руских фамелийох и ручних роботох новооснованей Роботнї старих ремеслох при Дружтве Руснацох у Сримскей Митровици.
Попри Шпивацкей ґрупи домашнього Дружтва Руснацох, дзецинскей ґрупи „Руски гвиздочки”, соло-шпивачох, та Тамурового оркестру Центру за културу „Сирмиюмарт”, на програми з авторску бешеду наступел ґлумец и предсидатель Дружтва Руснацох у Сримскей Митровици Владимир Балащак.
У бешедней часци програми наступели и ґлумци Театру „Ирена Колеса”, хторе роби при Дружтве, котри гуторели виривки з поеми Гелени Гафич Стойков „Мацери Рускинї”, як и школяре з роботнї руского язика.
Попри народней посланїци и членїци Националного совиту (НС) Руснацох Олени Папуґа, котра и бешедовала на початку програми, програму Митровчанох штварток провадзели и члени НС Руснацох Желько Ковач з Руского Керестура, Миломир Шайтош з Нового Саду у Юлиян Ковач зоз Шиду.
