СЕЧАНЬ – Остатнї дзень змаганя рецитаторох на тогорочней Покраїнскей смотри, всоботу, 23. априла, у конкуренциї старшого возросту пласман на Републичну смотру виборела Тимеа Будински з Руского Керестура, а медзи 20 найлєпшима у Войводини, добитнїками Златней дипломи и Мирослав Малацко з Руского културного центру (РКЦ) Нови Сад. Попри спомнутих, з рецитациями по руски у конкуренциї старшого возросту змагали ше и Леонтина Штефанко з Керестура и Александер Планкош за новосадски РКЦ. У катеґориї старшого возросту (штредньошколци, студенти и младеж) змагал ше 61 рецитатор.
На Републичну смотру рецитаторох, хтора найвиратнєйше будзе 13. мая у Валєве, з рецитациями по руски пласовали ше тройо рецитаторе – Ребека Семан з Руского Керестура у младшим, Валентина Салаґ з Дюрдьова у штреднїм и Тимеа Будински з Керестура у старшим возросту.
Попри нїх, за найлєпших у Войводини преглашени и Кристина Дюранїн з Дюрдьова у младшим, Матей Шепински з Руского Керестура у штреднїм и спомнути Малацко у старшим возросту.
За шицки три днї, од 21. по 23. април, на Покраїнскей смотри у шицких трох катеґорийох наступели вєдно 180 рецитаторе, котри рецитовали по сербски, мадярски, словацки, горватски, румунски, руски и по ромски, а оценьовала их шейсчцленова фахова комисия, у котрей бул и Михайло Зазуляк з Руского Керестура.