РУСКИ КЕРЕСТУР – У Руским Керестуре, у Основней и штреднєй школи з домом школярох „Петро Кузмяк” на соботу, 1. октобра, будзе пригодна програма з нагоди 200-рочнїци народзеня Петра Кузмяка, першого керестурского школованого учителя, педаґоґа, писателя, зазберовача народного скарбу и дзияка, а у орґанизациї домашнєй Школи и Националного совиту Руснацох, односно їх окремней Роботней ґрупи за означованє ювилею.
Програма почнє на 9,30 г. з кладзеньом квеца на бисту Петра Кузмяка у школским дворе, а потим у голу Школи будзе отворена вистава, з пригодну програму, хтору з тей нагоди пририхтує домашня Школа.
На 10 г. почнє Округли стол з тему „200 роки од народзеня Петра Кузмяка”, дзе викладаче буду др Янко Рамач, Дюра Латяк и Микола М. Цап, а модератор Сашо Сабадош.
Тиж будзе приказани и филм о Странянох у Словацкей – Кузмяковим родним месце, а презентацию Странянох и памяткох на учителя Кузмяка у тим месце пририхтали представителє Странянох и Штреднєй фаховей школи з Попраду у Словацкей.
Витворенє Округлого столу о Петрови Кузмякови резултат Спорозуменя о сотруднїцтве керестурскей и спомнутей школи з Попраду, хторе, з поштредованьом НС Руснацох, подписане 7. авґуста 2015. року у Руским Керестуре, так же орґанизаторе обчекую приход и векшого числа госцох зоз Словацкей.