ЧАРДАК – Вецей як 50 младих и одроснутих, углавним з Руского Керестура и даскельо з Коцура, од 14. по 17. юлий участвовали на духовно-рекреативним Стретнуцу „Марияполи” („Марийов варощик”) у Чардаку, у Делиблатскей писковини. На Стретнуцу було коло 240 учашнїкох рижних ґенерацийох, вирох и народох зоз Сербиї, Горватскей, Словениї, Македониї, Чарней Гори, Италиї, Портуґалу, Болгарскей и Русиї.
На преподаваньох и форумох ше преглїбйовало духовни теми о єдносци, економиї заєднїцтва, еколоґиї… а преподавал и керестурски парох о. Михайло Малацко, котри бешедовал о медзилюдских одношеньох и конфликтох. Окреме упечатлїви були особни шведоченя вири у каждодньовим живоце, медзи хторима було и єдно младей Керестурскей.
Попри спомнутого, кажди дзень були богослуженя, заєднїцки молитви, роботнї, шпацираня и рекреативни бависка.
На Стретнуцу представена и традиция народох-учашнїкох, та так и млади Руснаци у народним облєчиве одшпивали руски шпиванки, а на штанду понукали нашо традицийни лакотки – череґи, ґоргелї, колачи…
Таки лєтни стретнуца орґанизує Рух фоколарох по цалим швеце, а уж вецей роки и у Сербиї.