ДЮРДЬОВ – На вчерайшим шветочним випровадзаню малих матурантох за школяра ґенерациї у дюрдьовскей ОШ „Йован Йованович Змай” преглашена Николина Михальовски.
Попри Вуковей награди, вона достала похвалнїцу з биолоґиї, физики, ґеоґрафиї и нємецкого язика, специялни дипломи зоз сербского язика, подобовей култури, математики, технїчного и информатичного образованя. Як визначела директорка ОШ „Йован Йованович Змай” Мария Тртич, спомедзи шицких Вуковцох Михальовскова єдина того року участвовала на двох републичних змаганьох – на „Цо знаш о транспорту” и зоз сербского язика.
По преглашованю, як то по традициї, школярка ґенерациї у дворе Школи шицким присутним пречитала свой состав о школских памяткох, у мено цалей ґенерациї.
Додзелєни ище шейсц Вуково дипломи, а медзи Вуковцами и маломатурантка з руского оддзелєня Мария Барна.
