РУСКИ КЕРЕСТУР – Наймладши члени Руского културного центру з Нового Саду вчера на Мемориялє виведли дзецинску представу „Медведзова женїдба”, по мотивох приповедки у стиху Десанки Максимович, хтору прешпивал Микола Скубан, а у режиї Олї Яковлєв, хтора обдумала и сценоґрафию и костими. Представа полу-бабкарска, а мали ґлумци ше одлично знашли з текстом, гоч є у стиху.
У представи бавя Марина Грубеня, Михаило Пап, Фиона Грубеня, Николина Миячич, Лена Яковлєв, Лука Вуячич и Альоша Дюранїн.
Сала Дому култури знова була преполна з дзецми, а попри Керестурцох, представу патрели и 50 школяре руских оддзелєньох од першей по штварту класу ОШ з Коцура и Вербасу, зоз своїма учительками, чий приход на Мемориял финансовал Одбор за образованє Националного совиту Руснацох.
У представи хасновани стихи з писнї Миколи М. Кочиша „Як медведз преспал приход яри”, Мелания Римар написала монолоґи за початок представи и тексти за сонґи, док музику и ефекти поробел Мирослав Пап.
Вецей фотоґрафиї з представи у окремней ґалериї на початним боку сайту и на правим боку Рутенпресу.