НОВИ САД – Национални дзень студентох, 4. април, нєшка у Новим Садзе будзе означени з велїма активносцами на „фонтани” медзи студентскима домами „Велько Влахович” и „Слободан Баїч”.
Студентох Новосадского универзитету обчекує друженє, змаганя у шаху, столним тенису, пикаду, твистеру, а музику буду пущац троме ди-джейове. У рамикох промоциї безпечносци у транспорту будзе поставени и полиґон „пияних окулярох”, а буду орґанизовани и два гуманитарни акциї – зберанє кнїжкох и школскей лектири за основни и штреднї школи у сербских енклавох на Косове и Метохиї, як и уж позната акция „зоз затичку до ошмиху”.
Означованє Националного дня студентох потримали числени студентски и младежски орґанизациї и здруженя хтори ше занїмаю з еколоґию, фаховим усовершованьом, з превенцию наркоманиї, превенцию полно оберацих хоротох и шицки буду участвовац на нєшкайшей манифестациї.
Програма почнє на поладнє, а при концу друженя Туристична аґенция „Модена травел” студентом котри буду участвовац у наградних бавискох подарує дзешец наградни путованя до Греческей.
Национални дзень студентох ше означує як здогадованє на вельки студентски демонстрациї 1936. року, кед погинул студент Жарко Маринкович, котри ше борел за лєпши материялни стан студентох и за очуванє автономиї универзитетох.
Нєшкайши подїї орґанизую Студентска асоцияция Универзитету у Новим Садзе и студентски асоцияциї Филозофского, Польопривредного и Факултету технїчних наукох, у сотруднїцтве з другима студентскима орґанизациями на Новосадским универзитету.