РУСКИ КЕРЕСТУР – Нєшка, 24. юния, у Руским Керестуре почина 55. Фестивал рускей култури „Червена ружа”, а тирва по нєдзелю, 26. юний. Нєшка и на ютре програми Фестивалу буду на отвореней сцени у дворе Школи „Петро Кузмяк”, на нєдзелю у Велькей сали Дому култури, а „Ружу” провадзи и привредно-туристична и спортска програма.
Фестивал нєшка почнє на 17 годзин з отвераньом вистави подобових роботох Андєлки Античевич з Беркасова. Вистава будзе у голу Дому култури (у центре Керестура) и годно ю нащивиц шицки три днї Фестивалу.
Нєшка на 18 г. у дворе Школи будзе манифестация дзецох „Червене пупче”, а по програми за дзеци и диско у физкултурней сали Школи.
После „Пупча”, на 21 годзин (тиж у дворе Школи) будзе манифестация „Одгуки з ровнїни”, на хторей наступя шпивацки и музични ґрупи КУД-ох зоз скоро шицких наших местох.
На ютре, 25. юния, под час „Червеней ружи” буду вецей провадзаци програми, а на вечар, на 20 г. на отвореней сцени у Школи будзе Шветочни концерт „На штред широкей ровнїни”. На Концерту наступя нашо музично-танєчни ансамбли з Руского Керестура, Дюрдьова и Нового Саду, а потим госц вечару – ансамбл КУД „Сербия” з Кули.
После Шветочного концерту, у просторе Фестивалу за розвагу у дворе Школи, коло 22 годзин наступи тамбурашски оркестер „Равница” зоз Суботици.
Фестивал на нєдзелю, 26. юния будзе закончени зоз свою найстаршу манифестацию „Червена ружа”, на хторей ше буду змагац штернац млади шпиваче-аматере. За кошарку червених ружох ше змагаю 11 дзивки, а за чобольов троме леґинє – з Керестура, Дюрдьова, Коцура, Нового Саду, Сримскей Митровици и зоз Суботици. Тота програма будзе у Велькей сали Дому култури
У ревиялней часци нєдзельовей програми буду представени забавни композициї з албуму „Лєм єден погляд” автора Златка Русковския з Керестура, а з провадзеньом окремного оркестру, композициї буду шпивац Анамария Колошняї, Танита Ходак и Саня (Полдруги) Дивлякович.
Фестивал рускей култури „Червена ружа” финансийно потримую Министерство култури и информованя Републики Сербиї, Покраїнски секретарият за културу и явне инфомованє, Покраїнски секретарият за образованє, предписаня, управу и национални меншини-заєднїци, Општина Кула и Месна заєднїца Руски Керестур.