НОВИ САД/ДЮРДЬОВ – У Основней школи Йован Йованович Змай у Дюрдьове нєшка на 14,15 годзин, отрима ше роботня по проєкту „Кухня то школа”, на хторей буду участвовац дзеци нїзших класох з порядней и виборней настави руского язика. Источашнє то и промоция популарней сликовнїци и вифарбйованки „Кухня”.
У рамикох промоциї сликовнїци за дзеци зоз вифарбйованку „Кухня”, педаґоґ Наташа Мученски и редакторка того виданя Мая Зазуляк Гарди школяром отримаю интерактивну презентацию. Дзеци през роботню збогаца свойо знанє о кухнї и о руских єдлох. На промоциї будзе и єдна з авторкох чийо писньочки заступени у сликовнїци – Мелания Римар.
По законченю презентациї дзеци годни коштовац даєдни руски єдла. Тиж так, за шицких школярох буду порихтани и дарунки – сликовнїци за дзеци зоз вифарбйованку „Кухня” и древени прибор за кухню.
У сликовнїци поучни и франтовлїви писньочки сениорох руских творох за дзеци написали Агнета Бучко Папгаргаї, Силвестер Д. Макаї, Серафина Макаї, Юлиян Пап, Мелания Римар и Оксана Мудри Недич. Илустрациї сликовнїци и вифарбйованки креирала Мария Ковачевич.