РУСКИ КЕРЕСТУР – Дойсц до информацийох о добрим прикладу як розришени проблем з нєисправну воду за пице у сушедней Мадярскей, а вец заказац схадзку з чолнима людзми Општини Кула – будзе дальши крочай у обновеней инициятиви за ришованє проблемох з воду за пице, заключене на схадзки хтора вчера отримана у Месней заєднїци (МЗ) Руски Керестур.
Як поведзене, у ришованю проблему з воду потребне докончиц обезпечованє проєктней документациї за будуцу фабрику води, хтора будзе ришенє за вельо векшу присутносц арсену од дошлєбодзеного у терашнєй керестурскей води за пице.
Вчерайшу схадзку зволал о.д. секретара МЗ Юлиян Медєши, а после прешлотижньовей поради о порушованю ришованя проблему з воду за пице з руководзацима Еколоґийного руху (ЕР) „Желєни персцень” з Руского Керестура – предсидательку ЕР др Леону Доротич Ґутеша и предсидательку його Управного одбору примариюс мр Лилияну Соколов.
Попри спомнутих з ЕР „Желєни персцень” и представительох валалских здруженьох, на схадзки присуствовали покраїнски посланїк Славко Рац, заменїк началнїка Општинскей управи Кула Стєпан Вакула, руководитель Оддзелєня за инспекцийни роботи и защиту животного штредку Општини Кула Блажо Костич, предсидатель Совиту МЗ Владимир Олеяр, директор ЯКП „Руском” Иґор Фейди, та фахови консултант за проєктантску компанию СИД Велько Сузич зоз Зомбора.