РУСКИ КЕРЕСТУР – После жимскей паузи, рукометаше Русину прешлого тижня у Спортскей гали у Руским Керестуре почали ше пририхтовац за наступну полусезону першенства, а вовторок 1. марца, одбавели и перше контролне стретнуце процив рукометашох зоз Србобрану з резултатом 35:36 (18:19).
За полни 60 минути змаганя водзена, у першим шоре, солидна борбеносц домашнїх. Зазначени надосц добри поцаги поєдинцох, но було и гришки.
У першим полчаше, раз госци, раз домашнї водзели з ґолом-два розлики, дзе домашнї комбиновали рижни вариянти як у нападу, так и у охрани.
У другей часци змаганя, Русин водзел скоро през цали полчас, же би госци, при самим концу виєдначели и у остатнїм нападу ришели побиднїка приятельского стретнуца.
За Русин бавели – Даниєл Милинкович, Михайло Мудри, Виктор Микита, Славко Гербут, Борис Югик, Мирослав Виславски, Владимир Мудри, Владислав Салаґ, Филип Тома, Филип Орос, Неманя Стойков, Петар Пирожек, а змаганє судзели Иван Рац и Томислав Семан.
