НОВИ САД – Хижа у Улїци Матици сербскей 15 у Новим Садзе, о даскельо мешаци будзе шедзиско нашого Заводу за културу войводянских Руснацох.
Од кеди хижа купена, крочай по крочай ше ришовало просторни проблем наших двох институцийох – НВУ „Руске слово” и Заводу за културу войводянских Руснацох, хтори за тераз на истей адреси.
Роботи на адаптациї будинку почали концом марца прешлого року, а того априла би требали буц закончени и будинок би требал буц шветочнє отворени.
Обєкт дзе ше пощвидко преселї Завод будзе мац коло 240 квадратни метери простору за хаснованє. Окрем канцеларийного простору, адаптовани и пиньвица и пойд хтори спрам идейних ришеньох буду вецей як идеални и за отримованє културних манифестацийох.
Финансийни средства за адаптацию простору обезпечела Покраїнска влада и Национални совит и преруцени су на рахунок Заводу, одкаль ше виплацую виводзачом роботох.
Покраїнска влада указала порихтаносц обезпечиц и додатни средства за менши роботи вязани за ушоренє вонкашнього простору. Термин за реализацию достатих средствох од Покраїнскей влади 3. април того року.
