РУСКИ КЕРЕСТУР – У општини Кула почало пописованє обєктох за хтори нє видати будовательней дозволи, а по обисцох у Руским Керестуре пописоваче почню ходзиц у октобре, дознава Рутенпрес од єдного з членох Комисиї за пописованє Йоакима Надя.
– Пописовац ше будзе квартельни обєкти (будинки) збудовани после 1961. року, як и помоцни обєкти збудовани после 1973. року, дзе спадаю ґаражи, септични дзири, котларнїци, економски обєкти хтори служа за одкладанє польопривредней механїзациї, шопи, чардаки, маґазини, силоси, кармики – гварел предсидатель Комисиї за пописованє, општински инспектор за будовательство Миладин Пикула.
У Руским Керестуре буду пописовац двоме заняти у ЯКП „Руском“ – спомнути Надь и Ґоран Петкович, а гражданє по законє обовязни пущиц их же би окончели попис.
Пописовачом треба приявиц за хтори обєкти нє маю дозволу за будованє, цо потим будзе наведзене на поєдинєчних окремних пописних формуларох. По службеней длужносци, инспекция муши принєсц ришенє о валяню безправно збудовного обєкту, алє тото ришенє може значиц и початок озаконьованя (леґалиозованя) обєкту, гварел Пикула.
Закон о леґалиозованю обєктох прилапени концом прешлого рока предвидзує релативно тунї тарифи, так же за обєкт до 100 квадратни метери такса 5 000 динари, за обєкт од 100 до 200 квадрати 15 000, а од 200 до 300 квадрати 20 000 динари. У зависносци од квадратох, цени леґализованя иду и до 3 милиони динари.