Означена рочнїца Батинскей битки

автор сен
1.1k Опатрене

БЕЗДАН – Покраїнски функционере, амбасадор України Олександр Алаксандрович, городоначалнїк Зомбору Саша Тодорович, представителє СУБНОР-у Войводини, здруженьох борцох зоз Сербиї и реґиону, Войско Сербиї и поєдинци зоз спущованьом венцох до Дунаю при Бездану стреду, 11. новембра, означели рочнїцу Батинскей битки у Другей шветовей войни.

– Нєшкайши дзень державне швето и здогадуєме ше на жертви у Першей шветовей войни, а нєшка и дзень означованя битки на Батини, дзе на тисячи борци дали живот за подобни идеали – за лєпши живот наших дзецох и будучносц наших унукох. Зоз спущованьом венцох до Дунаю, символично ше здогадуєме же на тим просторе була єдна з найвекших биткох у Другей шветовей войни – гварел подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин.

Амбасадор України Олександр Алаксандрович з тей нагоди визначел же у Другей шветовей войни велї предводнїки помогли у побиди над фашизмом, алє мушиме буц подзековни насампредз вояком, нєшка ветераном, и поєдинцом котри на даяки способ участвовали у войни, понеже шицки вєдно вивойовали побиду.

Батинска битка була од 11. по 18. новембер 1944. року, дзе ше єдинки Народноошлєбодительного войска Югославиї (НОВЮ) и Червеней армиї борели процив єдинкох нємецкого Вермахту и їх союзнїкох. Батинска битка закончена з побиду єдинкох НОВЮ и Червеней армиї, з чим оможлївене їх дальше напредованє у ошлєбодзованю Югославиї и сушедних жемох.

6-Bezdan-02

ПОВЯЗАНИ ТЕКСТИ