РУСКИ КЕРЕСТУР – У рускокерестурскей Основней и штреднєй школи з домом школярох „Петро Кузмяк” всоботу, 1. октобра, з пригодну програму означена 200-рочнїца народзеня учителя Петра Кузмяка, чийо мено ноши керестурска Школа, тиж и єдна улїца у Керестуре, як и нашо Културно-уметнїцке дружтво у Новим Орахове.
З тей нагоди домашня Школа и Национални совит (НС) Руснацох, одн. їх окремна Роботна ґрупа, орґанизовали Округли стол пошвецени Петрови Кузмякови, на хторим участвовали и госци зоз Словацкей, зоз Штреднєй фаховей школи у Попрадзе и зоз Странянох, родного места учителя Кузмяка.
Шветочносц почала з кладзеньом квеца на бисту Петра Кузмяка опрез Школи, а квеце положели директор Школи з Попраду Василь Кузмяк и предсидателька Одбору за образованє НС Мелания Римар.
У школским голу присутних у мено домашнєй Школи привитала и виставу отворела педаґоґиня Любица Няради, а школяре другей класи руского оддзелєня Ґимназиї виведли кратку програму, преткану зоз стихами и народнима шпиванками. На поволанки директорки Школи Хелени Пашо Павлович же би вєдно означели тот ювилей подзековал директор Василь Кузмяк и старостка Странянох Вєрка Кравчакова.
На Округлим столє з тему „200 роки од народзеня Петра Кузмяка” модератор бул Сашо Сабадош, а барз интересантни викладаня виложели др Янко Рамач, котри бешедовал о „Живоце и дїялносци учителя Петра Кузмяка”, з наглашеньом на його живот и роботу у Руским Керестуре. Дюра Латяк мал викладанє з тему „Керестурски шлїди и памятки на Петра Кузмяка”, док Микола М. Цап ошвицел Кузмяка як першого руского поету.
Директор Школи з Попраду Василь Кузмяк презентовал специялно за тоту нагоду пририхтани видео-филм и фотоґрафиї пошвецени Кузмяковому родимому краю и валалу Страняни, а винєсол и паметаня своєй мацери на керестурского учителя Кузмяка, чий є и сам дальша родзина.
На шветочносци були присутни спомнути госци з Попраду, та з Гуменого, Старей Любовнї и других местох, котри пришли и на Фестивал „Червена ружа” и перши „Русин Филм Фест” у Шидзе.
Присутни були и вецей члени Националного совиту Руснацох, народна посланїца Олена Папуґа, керестурски парох и капелан о. Михайло Малацко и о. Михайло Шанта, члени колективу Школи „Петро Кузмяк” и други нашо културно-просвитни роботнїки.