НОВИ САД – У новосадским „Студию М” вчера вечар шветочно ознчена 25-рочнїца снованя Союзу Руснацох Українцох Сербиї (Союз). Присутних на програми привитал предсидатель Союзу Боґдан Виславски, а перши привитни и слова винчованки упутел подпредсидатель Покраїнскей влади Мирослав Васин котри, медзи иншим визначел же Войводина мултиетнїчна и мултикултурна реґия у хторей жию 26 розлични национални заєднїци, а по тим богатстве то єдинствени приклад у Европи.
Спред Националного совиту (НС) Руснацох сход привитал предсидатель Вивершного орґану НС Желько Ковач, котри Союзу повинчовал на витирвалей роботи, а рочнїцу нашому Союзу у мено Союзу Русинох-Українцох Словацкей повинчовал Виктор Бандурчин, котри на чолє делеґациї госцох зоз Словацкей хтора пришла за тоту нагоду.
Перши предсидатель Союзу академик Юлиян Тамаш бешедовал о снованю тей орґанизациї и визначел же ми Українцом коренє, а Українци нам коруна, пояшнююци значенє Києвскей Руси, хтора була заєднїцка держава шицким восточним Славяном и як писатель ше заложел за интеґритет України.
Отец Роман Миз бешедовал як други предсидатель Союзу, а тоту функцию окончовал у найчежших часох – у войни, кед требало ратовац наших братох споза Дунаю.
Терашнї предсидатель Союзу Боґдан Виславски пояшнєл потребу снованя Союзу осемдзешатих рокох прешлого вику, же би ше спред рускей заєднїци урядово заступало єй потреби пред державнима орґанами.
После привитних бешедох ушлїдзела уметнїцка програма у хторей участвовали Хор „Гармония” з Нового Саду, Хор „Пасторала” зоз Жаблю, КУД „Иван Котляревски” з Бикичу, КПД „Карпати” з Вербасу, Хор „Калина” з Индїї, як и солисти и дуети.
