Означени Дзень примиря у Першей шветовей войни

автор зам
875 Опатрене

БЕОҐРАД – З даваньом почесци погинутим и учашнїком у Першей шветовей войни, як и у других жемох ширцом швета и у Сербиї вчера означени Дзень примиря у Першей шветовей войни. З построєну Ґарду Войска Сербиї и интонованьом гимни, предсидатель Сербиї Томислав Николич венєц положел на памятнїк Нєпознатому юнакови на Авали, а провадзели го министер одбрани Зоран Дьордєвич и началнїк Ґенералштабу Любиша Дикович, преноша нашо медиї.

Премиєр Сербиї Александар Вучич, з построєну Ґарду и интнованьом гимни, венєц положел на Спомин-костурнїцу бранительох Беоґраду у Першей шветовей войни, а вєдно з министром вонкашнїх дїлох Велькей Британиї Борисом Джонсоном и на теметове Комонвелту на Новим теметове у Беоґрадзе.

Централна державна церемония з нагоди Дня примиря у Першей шветовей войни з воєнима и державнима почесцами була при Спомин-костурнїцу бранительох Беоґраду, а предводзел ю министер за роботу, обезпечованє роботи, борецки и социялни питаня Александар Вулин. Попри нього, венци положели и други министри у Влади Сербиї, представителє Войска Сербиї и Городу Беоґрад.

Квеце на Спомин-костурнїцу бранительох Беоґраду у Першей шветовей войни положели и амбасадоре Французкей, Нємецкей, ЗАД, ЕУ, Япону, Турскей, Русиї…, як и представителє здруженьох потомкох борцох и числени гражданє, а потим отримана и пригодна културно-уметнїцка програма.

ПОВЯЗАНИ ТЕКСТИ