КОЦУР/РУСКИ КЕРЕСТУР/ДЮРДЬОВ/КУЛА – Школяре коцурскей Основней школи „Братство єдинство” вчера на наставних годзинох означели и Европски дзень язикох, дзе з наставнїками бешедовали о значносци розличних язикох и важносци означованя Европского дня язикох. Тиж так, о тей теми направени и панои, хтори потим вилижени у голу Школи.
У коцурскей Школи ше попри руского, сербского и анґлийского язика виучує и французки и италиянски, а даєдни школяре ходза и на годзини мадярского язика.
З тим же вчера бул Европски дзень язикох, як и з його значеньом, упознати и школяре у ОШ „Йован Йованович Змай” у Дюрдьове, а у Школи „Петро Кузмяк” у Руским Керестуре Актив наставнїкох и професорох язикох, вєдно зоз школярами, у школским голу пририхтал пано, а штредньошколци мали квиз-змаганє.
Як дознава Рутенпрес, у школох у Кули, дзе ше виучує и руски язик, Европски дзень язикох будзе означени о тидзень, у рамикох Дзецинского тижня.