СЕРБИЯ – Як и у других европских державох, и у Сербиї ше нєшка означує Дзень побиди над фашизмом, источашнє и 70 роки законченя Другей шветовей войни. Найвекши збуваня з нагоди того державного швета орґанизовани у шицких векших городох, а у Беоґрадзе од 8. по 10. май тирваю рижни манифестациї.
Централна програма з нагоди Дня побиди будзе Шветочна академия у Сава центре, хтору орґанизує Одбор за отримованє традициї ошлєбодительних войнох Влади Републики Сербиї, а на хторей буду присуствовац представителє Влади Сербиї и визначни дипломати.
Провадзаци програми буду ревия антифашистичних филмох у Югославянскей кинотеки и проєкция филму українско-русийскей копродукциї „Битка за Севастополь“. У рамикох ревиї филмох будзе и округли стол з тему „Чи фашизем ище жиє?“, а потим наявена и музична програма, на хторей наступи Рамбо Амадеус.
Скупштина Автономней покраїни Войводини нєшка отрима Шветочну схадзку з нагоди означованя Дня побиди и Дня Европи.
З нагоди Дня побиди и означованя 70-рочнїци побиди над фашизмом, у Новим Садзе городоначалнїк Милош Вучевич, делеґация СУБНОР, Орґанизация воєних старшинох Городу Нови Сад и представителє Войска Републики Сербиї положа венци на памятнїки погинутим борцом НОВ, та на памятнїк Новосадскому партизанскому одряду у Ченею.