КОЦУР – Еколоґийни рух Вербасу, з вецей партнерами, вчера у Коцуре орґанизовал округли стол o потенциялох наутичного туризму на войводянских каналох. Програма отримана на преводнїци ДТД, як и на Пелетовим Салашу.
Присутни ше упознали з преводнїцу ДТД у Коцуре, як и з плївнима драгами у општини Вербас. Госци обишли нєдавно поставене пристанїще за чамци и одпочивалїще, а у рамикох округлого столу провадзели вецей презентациї о потенциялох наутичного туризму.
Представени и проєкт ЯВП „Води Войводини” о будованю ище єдного пристанїща за чамци на коцурскей преводнїци, як и нова ВСҐ тейнолоґия защити поверхносцох на и коло води од корозиї.
Попри числених представительох наутичних здруженьох з околїска и ширше, як и здруженьох и установох з валалу, на округлим столє присуствовали и представителька Министерства будовательства, транспорту и инфраструктури Ирена Конєвич, предсидатель Општини Вербас Милан Ґлушац, заменїк ґенералного директора ЯВП „Води Войводини” Стеван Илинчич и предсидатель Совиту Месней заєднїци Коцур Желько Бєлан.
Як гварел предсидатель Еколоґийного руху Вербасу Ратко Дюрдєвац, Коцур нє случайно вибрани як место отримованя того округлого столу, прето же ма вельо потенциялу хтори ище вше нє вихасновани, а з такима збуванями ше на нїх пробує обрациц увагу.
По законченю викладаньох и дебати присутни нащивели и преводнїцу у Вербаше, чарди и дереґлї на вербаским шлайсу, як и памятнїк будовательови каналу ДТД Йожефови Кишови.
