Омбудсман: Родну ровноправносц ше нє примєнює у пракси

автор 021/зам
941 Опатрене

НОВИ САД – Резултати виглєдованя Покраїнского защитнїка гражданох-омбудсмана о принципох родней ровноправносци на локалним уровню у Войводини указую же ше тей законскей обовязки дава вше менше значенє.

О тим шведочи факт же родно чувствительни буджет прилапени лєм у 13 одсто городох и општинох у Войводини, у 38 одсто є нє прилапени, док ше 9 одсто општинох пририхтує прилапиц го.

– На тото же кельо тот аспект применьованя принципох родней ровноправносци и творенє єднаких можлївосцох за жени и хлопох занєдзбани на локалним уровню указує и податок же на тото питанє нє одвитовали аж 40 одсто општинох и городох облапених з виглєдованьом – стої у звиту Покраїнского омбудсмана.

Податки нє доручели 42 одсто єдинки локалней самоуправи, у 52 одсто, з вєдно 27 локланих самоуправох хтори дали податки, постої особа задлужена за обласц родней ровноправносци, алє лєм у штирох локалних самоуправох постоя и заняти котри ше занїмаю виключно з тоту обласцу.

Тиж так, медзи членми городских и општинских радох пред остатнїма виберанками було скоро штири раз вецей хлопох. Городоначалнїци, лєбо предсидательки општини мали лєм 4 локални самоуправи, а лєм два жени були предсидательки скупштини городу, чи општини.

По Закону о ровноправносци полох, локални самоуправи обовязни обезпечиц ровноправносц полох и створиц єднаки можлївосци, цо подрозумює ровноправне участвованє женох и хлопох у шицких фазох планованя, приношеня и запровадзованя одлукох хтори уплївую на їх положенє, гвари Покраїнски омбудсман.

 

ПОВЯЗАНИ ТЕКСТИ