ВЕРБАС – Нєзависне дружтво новинарох Войводини (НДНВ) критиковало одлуку Скупштини општини Вербас же би часц занятих у Явним подприємстве (ЯП) за информованє „Вербас“, хторе пред гашеньом, анґажовала у новим, „медийским оддзелєню” ЯП „Стандард“, пише Войводянски виглєдовацко-аналитични центер (ВОИЦЕ), а вчера пренєсли вецей веб-портали у Сербиї.
Початком юлия Скупштина општини Вербас принєсла одлуку з хтору ше дїялносц ЯП „Стандард“, хторе ше занїма з одношеньом шмеца, хованьом и подмирйованьом з воду, преширело на продукцию кинематоґрафских дїлох, авдио-визуелних продуктох, продукцию телевизийней програми, на медийне представянє, та випитованє явного думаня. Як пише ВОИЦЕ, тоти роботни места предвидзени за дзепоєдних „вибраних” з ЯП за информованє „Вербас“.
Предсидатель Вивершного одбору НДНВ Недим Сейдинович гварел же тота одлука у процивносци нє лєм зоз Законом о явним информованю, алє и зоз Законом о явних подприємствох, здогадуюци же явни подприємства вецей не можу буц снователє медийох.
На критики реаґовал предсидатель Општини Вербас Братислав Кажич (СНС), котри гварел же тота одлука була єдини способ же би ше голєм дацо виратовало и демантовал же вибор людзох котри прейду з єдного до другого явного подприємства окончовани на основи членства у партийох.
ЯП за информованє „Вербас“ тераз емитує програми на „ТВ Бачка” и „Радио Вербас”.