КУЛА – У Основней школи „Петефи бригада“ у Кули вчера, 13. децембра, отримана годзина руского язика пошвецена творчосци Миколи М. Кочиша, а у рамикох Манифестациї Днї Миколи М. Кочиша.
Присутних привитала директорка Школи Ержебет Блашко, котра наглашела значносц пестованя мацеринского язика у настави, медзитим, як гварела, Школска управа того року зменшала число ґрупох зоз шицких язикох, та у тей школи будзе лєм єдна ґрупа за виучованє руского язика з елементами националней култури.
У мено орґанизатора Манифестациї Ирина Папуґа представела роботу Дружтва за руски язик, литературу и културу и творчосц Миколи М. Кочиша, а його биографию и стихи пречитали школяре котри ходза на годзини руского язика.
З тей нагоди Папуґова привитала и нову наставнїцу руского язика у Кули Тамару Хома, а предходней наставнїци – Мариї Стрибер (обидва з Руского Керестура), уручела Подзековане за вецейрочне посцигованє замеркованих резултатох з руского язика з кулскима школярами.
Ирина Папуґова до школскей библиотеки подаровала кнїжки, школяром подзелєла клайбаси и блоки за рисованє, а вони правели винчованки за наиходзаци жимски швета и подзелєли их госцом и наставнїцом.
На годзини присуствовала и Мелания Арваї спред Секциї Дружтва за руски язик, литературу и културу у Кули.