МИКЛОШЕВЦИ – Традицийне, 21. Стретнуце руских школох отримане всоботу, 6. юния у Миклошевцох, у Републики Горватскей. Домашня була Основна школа Чаковци, Подручна школа у Миклошевцох, а програма отримана и у рамикох означованя 165-рочнїци приселєня Руснацох до Миклошевцох.
На Стретнуцу участвовали наставнїци руского язика и школяре з Руского Керестура, Коцура, Дюрдьова, Кули, Савиного Села, Нового Орахова, Бачкей Тополї, Нового Саду, Ґосподїнцох, Сримскей Митровици, Шиду, Бачинцох, як и з Петровцох и Миклошевцох.
После шветочного отвераня Стретнуцох у просторийох КУД „Яким Ґовля” отримана културно-уметнїцка програма домашнїх школярох, хтору пририхтала учителька Леся Мудри, и школярох госцох, а потим учашнїки були опатриц грекокатолїцку церкву Рождества Пресвятей Богородици, дзе их дочекал и з историю тей церкви упознал парох миклошевски и викар славонско-сримски о. Йоаким Симунович. Госци з Войводини були и у Школи у Чаковцох, дзе их привитала директорка Ана-Мария Зулич. Медзи визначнима госцами були и предсидатель Вивершного одбору Националного совиту (НС) Руснацох Желько Ковач и предсидателька Одбору за образованє НС Мелания Римар.
Пополадню школяре мали подобову роботню, а наставнїки схадзку Активу, на хторей, медзи иншим, представена и кнїжка учителя Дюру Лїкара „Жвератко нашей младосци” и Фото-каталоґ о 20 дотераз отриманих Стретнуцох руских школох.
На концу, секретарка Дружтва за руски язик, литературу и културу Ирина Папуґова подзелєла припознаня з меном учительки Славки Сабадош.
Покровитель Стретнуцох було Министерство науки, образованя и спорту Републики Горватскей, а орґанизаторе Дружтво за руски язик, литературу и културу, його Секция у Миклошевцох и Основна школа Чаковци, Подручна школа у Миклошевцох.
