РУСКИ КЕРЕСТУР – У рамикох 47. Драмского мемориялу Петра Ризнича Дядї вчера у Доме култури Руски Керестур отримани Округли стол з тему „Терашнї стан у театралней дїялносци Руснацох”, дзе спатрена актуална ситуация и проблеми, та пробоване понукнуц можлїви ришеня же би тот сеґмент културного живота рускей националней заєднїци достал нови квалитет.
На Округли стол було добре одозванє, а у дискусиї, хтора мала критицки тони, алє доминовали реални становиска кед слово о театралней творчосци при Руснацох, Руским народним театре (РНТ) „Петро Ризнич Дядя” и Мемориялє, участвовали представителє Националного совиту Руснацох и його подручних канцеларийох зоз скоро шицких руских местох, як и актере нашого театралного живота, а окреме привитани госц Округого столу бул помоцнїк за културу предсидателя Покраїнскей влади Драґан Сречков.
После уводних рефератох о историяту и стану у руским театре, хтори дал директор Дому култури Йоаким Рац Мими, з окремним акцентом на Мемориял, и ситуациї у РНТ„Петро Ризнич Дядя”, хтору винєсла директорка Театру Ивана Дудаш, у дискусиї, чий модератор бул Михайло Зазуляк, найвецей ше бешедовало о механїзмох як интензивовац медзисобни госцованя руских представох, вихасновац кадровски потенциял и талант младей ґенерациї ґлумцох и режисерох, а окреме визначена потреба за квалитетнима драмскима текстами по руски.
Вецей фотоґрафиї з Округлого столу у окремней ґалериї на початним боку сайту и на правим боку Рутенпресу.