ШИД – Всоботу и нєдзелю, 1. и 2. октобра, у Шидзе отримани перши Медзинародни мултижанрови фестивал руского филму „Русин Филм Фест”, а пре технїчну гришку у електронских вязох, прецо Рутенпрес модлї за порозуменє руководительство орґанизатора, информация о Фестивалє на нашим порталє обявена нєшка, а нє дзень по його отримовню.
Медзинародни мултижанрови фестивал руского филму всоботу урядово отворел предсидатель Шветовей ради Шветового конґресу Русинох/Руснацох/Лемкох (РРЛ) Штефан Лявинец з Будапешту, а слова потримовки за порушованє и отримованє єдного такого фестивалу на отвераню висловели началнїк Општинскей управи Шид Ромко Папуґа у мено локалней самоуправи, народна посланїца у Народней скупштини Републики Сербиї Олена Папуґа и заменїк покраїнского секретара за културу, явне информованє и одношеня з вирскима заєднїцами Небойша Кузманович.
Перши дзень Фестивалу, всоботу, приказани виривки з даскельо филмох, як ретроспектива филмох хтори бешедую о Русинох/Руснацох, а потим приказани документарни филм „Траґедия Галицкей Руси” русийского режисера Алексея Денисова.
Други дзень Фестивалу, внєдзелю, 2. октобра, пре обєктивну нєможлївосц приходу учашнїкох зоз Словацкей нє отримани плановани Округли стол о страданю Русинох у Першей шветовей войни, алє приказани документарни филм хтори вони пририхтали за тоту нагоду. У филму приказане страданє Русинох у Першей шветовей войни на подручи восточней Словацкей.
Тиж приказани и виривки з филму о познатому уметнїкови русинского походзеня Ендийови Варголови, потим з култного америцкого филму „Ловар на єлєнї”, а на концу Фестивалу и филм „Мария нєвирнїца” з 1934. року.
У провадзацей културно-уметнїцкей програми з мотивами з даскелїх композицийох участвовал корепетитор Сербского народного тетру з Нового Саду Золтан Ґайдош, а з музику и шпиванку и госци з Мукачова, з України – Шпивацки ансамбл „Бетяре”.
Попри горе спомнутих госцох и представительох локалней самоуправи, на Фестивалє присуствовали и дзепоєдни члени Шветовей ради РРЛ, аташе у Амбасади Русийскей Федерациї у Беоґрадзе Алексей Морозов, совитнїк у Амбасади Билорусиї у Беоґрадзе Михаил Кажуро, госци з русинских орґанизацийох зоз Словацкей, України, Мадярскей и Горватскей, предсидатель Рускей Матки Сербиї и член Шветовей ради РРЛ Дюра Папуґа, чолнїки дзепоєдних наших установох, представителє нашей церкви и явного и културного живота, як и Дружтва сербско-русийского приятельства зоз Шиду.
Перши Медзинародни мултижанрови фестивал руского филму „Русин Филм Фест” орґанизовал Реґионални одбор Рускей матки (РМ) за Срим у Шидзе, а у рамикох активносцох и з потримовку Шветового конґресу РРЛ и його Шветовей ради, як и активносцох РМ у Сербиї.
Орґанизованє Фестивалу финансийно потримали Општина Шид и Покраїнски секретарият за културу, явне информованє и одношеня з вирскима заєднїцами АП Войводини.
