ВЕРБАС – Всоботу, 23. мая, у просторийох КПД „Карпати” у Вербаше отримани Пияти Фестивал хорского шпиваня „Хорски фестивал Карпати”, на хторим участвовали штири нашо и два госцуюци хори.
На Фестивалє наступели Хор „Розанов” з Дюрдьова, под дириґенством Татяни Барна, „Гармония” з Нового Саду, под дириґенством Весни Кесич Крсманович, Мишани Хор Дому култури и Катедралней церкви св. о. Миколая з Руского Керестура под дириґенством Лидиї Пашо, домашнї Хор КПД „Карпати”, под дириґенством Надїї Воротняк, а госци були Камерни хор „Класика нова” з Нового Саду, тиж под дириґенством Весни Кесич Крсманович и Хор „Бачки шпиваче” з Вербасу, под дириґенством Єлени Алексич. Хори шпивали од три до пейц композициї зоз свойого репертоару.
Водительки програми Гелена Папуґа и Єлена Кузма на початку програми подзековали за малюнок хтори Дружтву „Карпати” подаровал вербаски маляр Владо Няради, а првитни бешеди отримали апостолски еґзарх за грекокатолїкох у Сербиї владика Георгий Джуджар и предсидатель Националного совиту Руснацох Славко Рац.
Манифестацию провадзели и заменїк предсидателя НС Руснацох Йовґен Мудри, предсидателька Одбору за образованє НС Мелания Римар, представителє локалней самоуправи Вербас Даниєла Илич и Виктор Бесерменї, директор Заводу за културу Войводянских Руснацох Серґей Тамаш, директорка НВУ „Руске слово” Мартица Тамаш, о. Роман Миз з Нового Саду, старовербаски парох о. Алексий Гудак и други госци.
Пред наступом каждого хору рецитаторе „Карпатох” Петро, Ана и Павле Медєшово, та Гелена Брил, Тамара Маґоч и Ана Мария Лендєр рецитовали стихи наших поетох, а пририхтала їх Нада Лендєр.
Фестивал, хтори у Календаре репрезентативних манифестацийох Руснацох Националного совиту потримали Национални совит, Општина Вербас, Министерство култури и информованя Републики Сербиї и Покраїнски секретарият за културу и явне информованє АП Войводини, а по законченей програми друженє предлужене у просторийох ЦФК „Драґо Йовович”.
